Reshjet e fundit të shiut kanë shkaktuar rrëshqitje dherash dhe bllokime rrugësh në disa bashki të qarkut Gjirokastër, ku strukturat vendore janë angazhuar në terren për pastrimin e inerteve, hapjen e rrugëve dhe vlerësimin e dëmeve.
Bashkia Gjirokastër
Puna vazhdon në njësinë administrative Qytet, kryesisht në lagjen Granicë e sipërme, përroin e Gjokanës në lagjen Zinxhira dhe zonën pas Kalasë në Pazarin e Vjetër. Pas vlerësimit të gjeologëve, do të ndërhyhet pranë ish-agjencisë së udhëtarëve. Në bashkëpunim me Forcat e Armatosura, do të pastrohet aksi Dhoksat–Gjatë–Këllëz–Qestorat në Lunxhëri dhe rrugët e brendshme të fshatit Lazarat.
Bashkia Libohovë
Në njësinë Zagori, hyrjet në fshatrat Zhej, Lliar dhe Topovë mbeten të bllokuara për shkak të paqëndrueshmërisë së terrenit. Ndërhyrjet kushtëzohen nga raporti i specialistëve gjeologë.
Bashkia Memaliaj
Një rrugë e brendshme në njësinë Memaliaj fshat është e pakalueshme. Bashkia do të ndërhyjë vetëm në zonat pa rrezik, pas vlerësimit gjeologjik.
Bashkia Dropull
Dëmtimi i urës së Glinës është përkeqësuar, ku reshjet kanë prekur edhe një këmbë tjetër.
Bashkia Përmet
Aksi Përmet–Dogana e Tre Urave ka qarkullim të kufizuar në një segment rreth 25 metra në hyrje të fshatit Petran. Priten vlerësime për ndërhyrje në lagjen Sede, ndërsa gjatë ditës do të pastrohen rrugët në fshatrat:
- Në njësinë Piskovë: Bual, Hotovë, Mokricë, Kosovë;
- Në Petran: Tremsht.
Situata në bashkitë e tjera
Në Bashkinë Këlcyrë nuk raportohen bllokime, ndërsa në Tepelenë aksi Subash–Hormovë është problematik për mjetet e rënda.
OSHEE njofton furnizim normal me energji elektrike në të gjithë qarkun, ndërsa lumenjtë Vjosë dhe Drino janë në kuota të zakonshme.
Përditësime
Prefekti i qarkut Gjirokastër njoftoi situatën aktuale në qark.
Në Bashkinë Këlcyrë:
- Pastrimi i inerteve ka përfunduar.
- Infrastruktura është rikthyer në normalitet.
- Komisioni po vazhdon vlerësimin e dëmeve.