Dy persona kanë humbur jetën dhe disa të tjerë dyshohet se janë bllokuar nën rrënoja pas rrëshqitjeve të dherave në Ishullin e Veriut të Zelandës së Re. Ngjarja ndodhi në zonën Welcome Bay, ndërsa ekipet e shpëtimit po kryejnë kërkime intensive në një kamping të frekuentuar në Mount Maunganui.
Autoritetet njoftuan se nuk ka shenja jete në zonën e kampingut. Mes personave të zhdukur ndodhet të paktën një vajzë e mitur. Rrëshqitjet u shkaktuan nga reshje të dendura shiu ditët e fundit, të cilat sollën përmbytje dhe ndërprerje të energjisë elektrike në disa rajone.
Kryeministri Christopher Luxon deklaroi se vendi është "i mbushur me dhimbje" pas kësaj ngjarjeje. Ai bëri thirrje për unitet dhe solidaritet ndaj të prekurve. Gjendje emergjence është shpallur në disa zona të Ishullit të Veriut.
Banorët e zonës janë evakuuar nga shtëpitë. Rrugët dhe infrastrukturat e dëmtuara po vështirësojnë operacionet e shpëtimit. Ekipet kombëtare dhe lokale po punojnë për shpëtimin e personave të mundshëm të bllokuar nën rrënoja.
Operacionet e kërkim-shpëtimit do të vazhdojnë edhe gjatë natës. Komuniteti lokal po ofron ndihmë për të prekurit.