Të dhënat zyrtare të Entit Federal i Statistikave të Gjermanisë tregojnë se në vitin 2025 rreth 1.9 milionë gjermanë me arsim të lartë ndodheshin në rrezik varfërie. Ky numër përbën një rritje prej 350 mijë vetësh krahasuar me vitin 2022.
Numri i personave me diplomë universitare në Gjermani arriti në rreth 21 milionë në vitin 2025. Të dhënat e Agjencisë Federale të Punës tregojnë se papunësia në radhët e të diplomuarve u rrit në 3,3%, nga 2,2% tri vite më parë.
Komenti i Sahra Wagenknecht
Sahra Wagenknecht, themeluese e partisë Aleanca Sahra Wagenknecht (BSW), deklaroi se "përkeqësimi i gjendjes dhe varfëria prekin tani të gjitha shtresat shoqërore në të gjitha nivelet e arsimimit". Ajo u bëri thirrje politikanëve të ringjallin ekonominë dhe të mundësojnë lëvizshmëri sociale përmes punës së ndershme.
Krahasimi me nivelet e tjera arsimimi
Rreziku i varfërisë mbetet më i lartë për personat me arsim të ulët ose të mesëm. Në vitin 2025, nga 14,3 milionë vetë me kualifikime të ulëta, rreth 4,1 milionë konsideroheshin në rrezik varfërie. Edhe personat me arsim të mesëm përballen me rrezik më të madh se të diplomuarit.
Sipas përkufizimit zyrtar në Gjermani, në rrezik varfërie klasifikohet kushdo që fiton më pak se 60% të të ardhurës mesatare, e cila ishte 1.446 euro në muaj për një të rritur që jeton vetëm në vitin e kaluar. Të dhënat u publikuan si përgjigje ndaj një kërkese të partisë BSW.