Një aksident ajror ka ndodhur në landin Nordrhein-Westfalen të Gjermanisë, ku një avion i vogël privat është rrëzuar duke lënë pas tre viktima. Ngjarja është regjistruar rreth orës 11:20, në afërsi të qytetit Erkelenz, konkretisht pranë fshatit Gerderath.
Avioni, i identifikuar si model Cessna 172 me katër ulëse, kishte si pikënisje Holandën. Pas hyrjes në hapësirën ajrore gjermane, avioni humbi lartësinë dhe u përplas në një fushë, duke u shkatërruar thuajse plotësisht. Policia e qarkut Heinsberg ka konfirmuar se asnjë prej tre personave në bord nuk ka mbijetuar. Identiteti i viktimave mbetet ende i paidentifikuar nga autoritetet.
Ekipet e shpëtimit dhe forcat policore kanë mbërritur në vendngjarje menjëherë pas rrëzimit. Ndërkohë, autoritetet gjermane kanë nisur hetimet për të përcaktuar rrethanat dhe shkaqet që çuan në këtë aksident. Sipas raportimeve, avioni ishte në pronësi të Vliegschool Hilversum.
Përditësime
Hetuesit zbardhën detajet e fundit të fluturimit fatal: avioni u ngrit nga aeroporti i Hilversumit në orën 10:26 dhe u rrëzua midis orës 11:15 dhe 11:17. Dëshmitarët okularë raportuan manovra të pazakonta dhe sjellje të çrregullt të mjetit fluturues përpara se ai të ndryshonte kursin papritur pranë Merbeckut dhe të humbiste lartësinë. Shërbimi Federal për Ndihmë Teknike (THW) iu bashkua operacionit të shpëtimit në vendngjarje, ku autoritetet konfirmuan mungesën e zjarrit pas përplasjes.