Dy persona kanë humbur jetën pasi një avion i vogël u rrëzua në një zonë banimi në qytetin Limburgerhof të Gjermanisë jugperëndimore.
Sipas zëdhënësit të policisë Thorsten Mischler, të dy personat që ndodheshin në bord kanë humbur jetën gjatë aksidentit. Aktualisht nuk ka raportime për banorë të lënduar rëndë, megjithëse transmetuesi publik SWR bën të ditur se të paktën një person tjetër është lënduar.
Aksidenti ndodhi rreth orës 11:30 sipas kohës lokale. Dëshmitarë thanë se avioni duket se ka shpërthyer në ajër para se të binte, ndërsa mbetje të tij janë shpërndarë në një zonë të gjerë. Avioni ka prekur edhe një shtëpi, duke shkaktuar dëme.
Forca të shumta policie dhe ekipe emergjence janë vendosur në vendngjarje. Zona e rrëzimit është rrethuar dhe një helikopter policie po përdoret për fotografime ajrore. Hetimet për të zbuluar shkaqet e aksidentit vazhdojnë.