Ky artikull është përditësuar. Shiko përditësimet
Situata në disa zona të Bashkisë Lushnjë paraqitet kritike si pasojë e rritjes së prurjeve në lumenjtë Shkumbin dhe Seman, të shkaktuara nga reshjet e shumta të ditëve të fundit.
Në fshatin Thanasaj, ujërat e lumit Shkumbin kanë përfshirë dhjetëra banesa dhe oborre, duke krijuar vështirësi për banorët. Megjithatë, niveli i ujit brenda argjinaturës nuk paraqet rrezik të menjëhershëm për dalje jashtë saj.
Situata mbetet shqetësuese edhe në lumin Seman. Fshati Murriz-Kozare ndodhet nën ndikimin e drejtpërdrejtë të ujërave të këtij lumi, ndërsa rritja e nivelit të tij rrezikon disa fshatra përgjatë argjinaturës.
Gjendja më problematike raportohet në fshatin Imshtë, ku niveli i ujit është pothuajse në të njëjtën lartësi me argjinaturën. Deri tani nuk ka rrezik për çarje të argjinaturës, por nëse prurjet vazhdojnë me të njëjtin intensitet, ujërat mund të kalojnë mbi të.
Përditësim
Lumi Shkumbin ka dalë nga shtrati në zonën e Lushnjës, duke shkaktuar përmbytje direkte në disa fshatra përgjatë bregut.