Situata epidemiologjike në Greqi paraqitet shqetësuese për shkak të qarkullimit intensiv të virusit të Nilit Perëndimor. Sipas të dhënave zyrtare të EODY, që nga fillimi i periudhës së mbikëqyrjes janë identifikuar 65 raste vendase në 25 bashki të ndryshme të vendit. Prej tyre, 54 pacientë kanë shfaqur manifestime të rënda që prekin Sistemin Nervor Qendror, si encefalit, meningjit ose paralizë akute, ndërsa 11 persona kanë pasur simptoma të lehta ose nuk kanë shfaqur komplikacione neurologjike.
Sipas autoriteteve, gjashtë viktimat e shënuara ishin individë mbi 65 vjeç me gjendje shëndetësore të rënduar. Aktualisht, 20 pacientë ndodhen të shtruar në spitale, ku një pjesë e tyre po marrin trajtim të specializuar në njësitë e kujdesit intensiv. Rastet janë përqendruar në dhjetë njësi rajonale të rajoneve të Atikës, Thesalisë dhe Maqedonisë Qendrore. Zonat më të prekura përfshijnë:
• Sektorët Verior, Qendror dhe Jugor të Athinës
• Atikën Lindore dhe Perëndimore
• Njësitë rajonale të Karditsës, Larisës dhe Trikalës
• Njësitë rajonale të Pellës dhe Serres
Virusi transmetohet kryesisht përmes pickimit të mushkonjave, të cilat infektohen nga shpendët. Ekspertët shpjegojnë se rreth 80 për qind e të infektuarve nuk shfaqin shenja klinike, ndërsa pjesa tjetër kalon një gjendje të ngjashme me gripin. Më pak se 1 për qind e të prekurve zhvillojnë komplikacione të rënda neurologjike. Grupet më të rrezikuara mbeten të moshuarit, personat me sëmundje kronike dhe individët me imunitet të dobësuar. EODY paralajmëron se sezoni i transmetimit nuk ka përfunduar dhe se pritet që në javët në vijim të shtohen rastet e reja si në zonat ku virusi është prezent, ashtu edhe në rajone të tjera të vendit.
Përditësime
Organizata Kombëtare e Shëndetit Publik (EODY) njoftoi 23 raste të reja të virusit të Nilit Perëndimor gjatë javës së fundit. Sipas të dhënave të datës 5 gusht 2026, qarkullimi i virusit është intensifikuar, veçanërisht në rajonin e Atikës, duke rritur numrin total të të infektuarve për këtë sezon epidemik.
Autoritetet shëndetësore greke kanë identifikuar vatrat kryesore të virusit të Nilit Perëndimor në rajonin e Atikës. Bashkia e Spata-Artemidës kryeson me 11 raste, ndjekur nga Markopoulo Mesogaias me 7 dhe Pallini me 5 raste. Aktualisht, 12 pacientë ndodhen në gjendje të rëndë: 8 janë të shtruar në Njësinë e Kujdesit Intensiv (ICU) dhe 4 në Njësinë me Varësi të Lartë (HDU).
Virusi i Nilit Perëndimor po përhapet në 7 vende europiane, ku përfshihen Italia, Greqia, Rumania, Franca, Maqedonia e Veriut, Spanja dhe Gjermania. Italia kryeson listën me 94 raste të konfirmuara, nga të cilët 38 pacientë janë shëruar dhe janë larguar nga spitali, ndërsa një rast nuk ka kërkuar shtrim. Sipas modeleve seroepidemiologjike, shkalla e vërtetë e infektimit mendohet të jetë shumë më e lartë: për çdo rast me komplikacione neurologjike, vlerësohet se rreth 140 persona të tjerë janë infektuar në heshtje, pa shfaqur simptoma të rënda.