Numri i viktimave nga moti i keq në Portugali ka arritur në 16, sipas mediave vendase. Viktima e fundit është një burrë i moshuar që ra nga çatia në qytetin e Pombalit, ndërsa përpiqej ta riparonte.
Ky nuk është aksidenti i parë fatal i këtij lloji, për shkak të vështirësive në ofrimin e ndihmës dhe vonesave në reagim. Këto zhvillime çuan në dorëheqjen e Ministrës së Brendshme, Maria Lucia Amaral, e cila u kritikua ashpër për menaxhimin e përmbytjeve në javët e fundit. Në një deklaratë, ajo shprehu se "ndiente se nuk kishte kushtet personale dhe politike të nevojshme për të kryer detyrat e saj".
Alarmi i motit mbetet shumë i lartë, pasi kushtet nuk priten të përmirësohen të paktën deri të shtunën. Gjatë natës, rreth 3000 banorë u evakuuan nga qyteti i Coimbrës, ku lumi Mondego doli nga shtrati dhe shkaktoi përmbytje kryesisht në zona rurale. Kjo detyroi mbylljen e autostradës kryesore A1.
Autoritetet planifikojnë evakuime të mëtejshme. Një seri stuhish dimërore kanë shkaktuar përmbytje, rrëshqitje toke, ndërprerje të energjisë elektrike dhe dëme në infrastrukturë në shumë pjesë të vendit me 10.7 milionë banorë.