Bilanci i aksidentit automobilistik të ndodhur në zonën e Manzës në Durrës është rënduar mëngjesin e 23 gushtit, pas njoftimit për vdekjen e 16-vjeçarit Klevis Dervishi. I mituri kishte pësuar dëmtime të rënda pas përplasjes së ndodhur në orët e para të 19 gushtit dhe, pavarësisht trajtimit mjekësor në Spitalin Universitar të Traumës, nuk ka mundur të mbijetojë.
Në këtë ngjarje tragjike, përveç 16-vjeçarit, jetën e kanë humbur edhe tre persona të tjerë:
• Kleo Vrioni, 25 vjeç, drejtuesi i automjetit
• Sara Brugnatelli (ose Brugentelli), 26 vjeçe, bashkëshortja e drejtuesit
• Alvi Muhaxhiri, 15 vjeç
Sipas të dhënave nga ekspertiza policore, aksidenti ndodhi rreth orës 02:22-02:30, teksa automjeti po lëvizte në drejtim të fshatit Katund i Ri. Automjeti, i cili drejtohej nga Kleo Vrioni, po lëvizte me një shpejtësi prej 114 km/orë. Dyshohet se drejtuesi ishte në gjendje të dehur në momentin kur humbi kontrollin në një kthesë, duke u përplasur fatalisht me bordurën anësore të rrugës. Në automjet ndodheshin pesë persona, të cilët po ktheheshin pasi kishin dalë për të festuar.
Një tjetër person që ndodhej në mjet, 25-vjeçari Rejsi Vrioni, mbeti i plagosur, por ndodhet jashtë rrezikut për jetën. Autoritetet ligjzbatuese po vijojnë hetimet për të zbardhur në mënyrë të plotë të gjitha rrethanat e këtij aksidenti.