Rritja e interesit për verifikimin e diplomave të lëshuara nga Universiteti i Mitrovicës së Veriut, i cili funksionon brenda sistemit të Serbisë, vjen në kohën kur autoritetet e Kosovës paralajmërojnë integrimin e sistemeve arsimore dhe shëndetësore serbe në atë të Kosovës.
Deputeti në Kuvendin e Kosovës nga Lista Serbe, Igor Simiq, deklaroi se nuk "sheh nevojë, as kuptim" që punonjësit në institucionet shëndetësore dhe arsimore serbe, në mjediset me shumicë serbe në Kosovë, të verifikojnë diplomat e tyre. Ai shpjegoi se këta punonjës kanë status të rregullt pune në sistemin e Serbisë dhe se pyetjet lindin vetëm nëse ata synojnë të kalojnë në sistemin e Kosovës. "Qytetarët pyesin çdo ditë për këtë… unë nuk shoh ndonjë arsye që të pyesin, përveç nëse e kanë ndërmend ta lënë vendin e punës që kanë dhe të aplikojnë për të qenë pjesë e një sistemi tjetër. Ky është i vetmi shpjegim logjik", tha Simiq në një intervistë për Televizionin Most. Ai shtoi se as vetë nuk e ka verifikuar diplomën e tij.
Verifikimi i diplomave nga ky universitet është i detyrueshëm për aplikim pune, marrje licence profesionale ose dhënie provimesh në institucionet publike të Kosovës.
Sektori i shëndetësisë dhe arsimit në mjediset me shumicë serbe vazhdon të operojë brenda sistemit serb, ndërsa institucionet e tjera të financuara nga Beogradi janë mbyllur kryesisht gjatë dy vjetëve të fundit nga autoritetet e Kosovës si ilegale dhe paralele.
Zyrtarë të lartë të Kosovës kanë theksuar se sistemi dual i shëndetësisë dhe arsimit nuk është i qëndrueshëm dhe se integrimi në një sistem të vetëm është i nevojshëm. Ministri për Komunitete dhe Kthim në Qeverinë e Kosovës, Nenad Rashiq, vlerëson se verifikimi i diplomave është i nevojshëm për pjesëtarët e komunitetit serb.