Rendimentet e bonove të thesarit 12-mujore u rritën lehtë në ankandin e parë të vitit 2026, sipas të dhënave nga Banka e Shqipërisë. Rendimenti mesatar i ponderuar arriti në 2.47%, nga 2.44% në ankandin e fundit të vitit 2025. Kjo shënon rritjen e parë që prej mesit të vitit të kaluar.
Ministria e Financave shpalli për financim 8.5 miliardë lekë, ndërsa kërkesat totale në ankand arritën 10.44 miliardë lekë. Megjithatë, pjesa e pranuar e ofertave konkurruese mbeti e ulët, në 3.11%.
Tremujori i parë i vitit ka përqendrimin më të lartë të huamarrjes qeveritare në tregun e brendshëm. Sipas kalendarit të emetimeve, huamarrja e planifikuar për këtë periudhë është 134 miliardë lekë, në rritje me 1.1% krahasuar me të njëjtën periudhë të vitit 2025. Kjo shumë përbën mbi 35% të totalit vjetor të emetimeve të parashikuara.
Për vitin 2026 në tërësi, huamarrja e re në tregun e brendshëm parashikohet 45 miliardë lekë, 10% më e ulët se në buxhetin e vitit 2025.
Rendimentet e ulëta të bonove, veçanërisht të afatshkurtra, ndikojnë në koston e kredisë në lekë për sektorin privat. Kreditë afatgjata kuotohen zakonisht mbi ecurinë e këtyre bonove, duke çuar në norma interesi të ulëta.