Në orët e para të mëngjesit të 1 shkurtit 2026, rreth orës 02:45, në Radhimë të Vlorës u regjistrua një rritje e pazakontë e nivelit të detit. Sipas peshkatarëve vendas, ky fenomen nuk është vërejtur më parë me këtë formë dhe intensitet.
Uji avancoi drejt tokës dhe depërtuar në disa zona pranë qendrës së peshkimit në Radhimë. Varkat e ankoruara u tendosën fort nga litarët për shkak të ngritjes së menjëhershme të nivelit të detit. Gjithashtu, uji vërshoi në magazinat pranë portit të peshkimit, duke krijuar shqetësim për mjetet dhe pajisjet e punës.
Rritja e nivelit të detit ishte më e madhe se baticat e zakonshme, të cilat zakonisht arrijnë 40-60 centimetra. Peshkatarët vlerësojnë se ajo arriti gati 1 metër, madje edhe më shumë. Nëse situata vazhdon, ekziston rreziku që uji të dalë në rrugë dhe të shkaktojë dëme të mëtejshme.
Një element tjetër i fenomenit ishte dalja e disa peshqve në tokë, gjë që ndodh zakonisht gjatë detit të trazuar ose ndryshimeve të forta të nivelit të ujit. Peshkatari Sherif Dyrmishaj shprehet se këto ndryshime klimatike po i befasojnë vazhdimisht: "Niveli i detit ka qenë mbi normalen dhe madje turma peshqish kanë dalë në tokë, gjë që nuk është normale. Niveli i zakonshëm i baticës dhe zbaticës është 40-60 cm, por kësaj herë ka qenë më shumë se 1 metër. Kjo është një e panjohur dhe nuk dimë se çfarë do të ndodhë nesër."
Peshkatarë të tjerë, që ndodheshin në det në atë orë, u shprehën të habitur për këtë fenomen të rrallë, duke theksuar se nuk e kishin parë kurrë më parë.