Komuna e Prishtinës ka njoftuar se nga 4 maj 2026 është ndryshuar qarkullimi i mjeteve motorike në rrugën „Ilaz Kodra“ në lagjen Dardania. Ndryshimi kthen rrugën në gjendjen e mëparshme njëkaheshe, pas përfundimit të punimeve dhe riparimeve infrastrukturore në zonë.
Sipas vendimit të kryetarit Përparim Rama, rruga „Ilaz Kodra“ do të ketë një kah qarkullimi, duke filluar nga kryqëzimi me rrugën „Sali Çeku“ në drejtim të rrugëve „28 Nëntori“ dhe „Ise Boletini“. Këto dy rrugë vazhdojnë të jenë me dy kahje qarkullimi.
Ndryshimet synojnë përmirësimin e rrjedhës së trafikut dhe rritjen e sigurisë në zonë. Komuna apelon te qytetarët dhe pjesëmarrësit në trafik të respektojnë sinjalistikën e re rrugore dhe të tregojnë kujdes të shtuar gjatë qarkullimit.