Deputeti i Partisë Demokratike të Kosovës, Rrustem Mustafa, ka propozuar një nismë politike që synon dhënien fund bllokadës institucionale në vend. Përmes një njoftimi në rrjetet sociale, ai u ka bërë thirrje për bashkëpunim Lëvizjes Vetëvendosje, PDK-së dhe përfaqësuesve të komuniteteve joshumicë.
Sipas Mustafës, kjo platformë, e titulluar "Koalicioni për Normalitet", bazohet në tri shtylla kryesore që synojnë funksionalitetin shtetëror:
• Legjitimiteti: LVV-së, si forcës së parë parlamentare, i njihet roli drejtues në qeverisje dhe në Kuvend.
• Balanca dhe Presidenca: PDK-ja merr përgjegjësinë për kontrollin demokratik, ekuilibrin institucional dhe orientimin euroatlantik, me kusht që të udhëheqë me Presidencën.
• Përfaqësimi: Garantimi i rolit kushtetues dhe përfaqësimit të plotë për komunitetet joshumicë.
Platforma përcakton gjithashtu katër parime strategjike për funksionimin e shtetit. Mustafa kërkon forcimin e partneritetit me SHBA-në dhe NATO-n, afrimin e institucioneve me shtetin shqiptar dhe me shqiptarët në rajon, si dhe mbrojtjen e vlerave të luftës së Ushtrisë Çlirimtare të Kosovës. Ai u ka bërë thirrje institucioneve që të shmangin pengesat administrative ndaj veteranëve dhe të ndërtojnë një narrativë shtetërore gjithëpërfshirëse.
Duke iu drejtuar kryetarit të LVV-së, Albin Kurtit, deputeti i PDK-së ka theksuar se çelësi për hapjen e kësaj tryeze dialogu qëndron te vullneti i partisë në pushtet. Mustafa e cilëson këtë marrëveshje si një domosdoshmëri për të shmangur krizat e reja politike dhe për t'i dhënë vendit një perspektivë të qëndrueshme evropiane, duke theksuar se zgjidhja është në duart e Kurtit.
Përditësime
Rrustem Mustafa ka konfirmuar një takim personal me kryetarin e LVV-së, Albin Kurti, për të diskutuar detajet e platformës "Koalicioni për Normalitet". Mustafa e përshkroi bisedën si të gjatë dhe të frytshme. Palët kanë filluar negociatat zyrtare mbi këtë propozim. Deputeti i PDK-së konfirmoi se është në pritje të ftesës së radhës nga Kurti për të vazhduar diskutimet mbi formimin e "Paktit për Shtetin".
Deputeti i PDK-së, Rrustem Mustafa, ka propozuar një formulë specifike ndarjeje të pushtetit, ku PDK do të merrte postin e Presidentit, ndërsa Lëvizja Vetëvendosje do të mbante Qeverinë dhe Kuvendin. Mustafa ka kërkuar gjithashtu përfshirjen e deputetëve të komuniteteve joshumicë për të siguruar shumicën e nevojshme parlamentare. Burime brenda partive sqarojnë se ky propozim mbetet qëndrim personal i Mustafës dhe nuk pasqyron negociata zyrtare mes palëve. Ndërkohë, PDK vazhdon zyrtarisht të kundërshtojë Qeverinë Kurti dhe çështjen e konstituimit të Kuvendit e ka dërguar për shqyrtim në Gjykatën Kushtetuese.