Anëtari i Partisë Demokratike të Kosovës, Rrustem Mustafa, përmes një reagimi në rrjetin shoqëror Facebook, ka vlerësuar se vendi ndodhet në një moment kyç që kërkon përgjegjësi politike. Sipas tij, Kosova ka nevojë imediate për institucione të qëndrueshme dhe një ekzekutiv funksional, duke bërë thirrje që partitë politike t'i lënë mënjanë përllogaritjet taktike dhe eksperimentet politike.
"PDK-ja është e gatshme të luajë rolin vendimtar në ndërtimin e qeverisë së re, me vizion të qartë, përgjegjësi dhe orientim euroatlantik", ka deklaruar Mustafa. Ai ka shtuar se politika duhet të jetë në shërbim të qytetarëve, duke forcuar shtetin dhe duke ruajtur partneritetin strategjik me aleatët e Kosovës.
Kjo deklaratë e Mustafës pason qëndrimin e shprehur më herët nga kryetari i PDK-së, Bedri Hamza, i cili kishte bërë të ditur se partia do të vazhdonte veprimtarinë e saj në opozitë. Megjithatë, Mustafa këmbëngul se e ardhmja e vendit kërkon vendimmarrje të përgjegjshme dhe se Kosova nuk ka kohë për të humbur me bllokada.
Duke e mbyllur mesazhin e tij me thirrjen "Koha është për një qeveri normale. Koha është për Kosovën", ai nënvizoi se ndërtimi i institucioneve duhet të jetë prioritet për çdo subjekt politik, mbi çdo interes tjetër ditor.