Deputeti i rizgjedhur i Lëvizjes Vetëvendosje, Adnan Rrustemi, ka deklaruar se PDK-ja po ndërhyn në brendësi të LDK-së përmes figurave të caktuara, të cilat, sipas tij, po punojnë për të penguar afrimin e kësaj partie me Vetëvendosjen. Në një intervistë për KosovaPress, Rrustemi përmendi rastin e Përparim Ramës si një prej elementeve që po ndikojnë negativisht ndaj lidershipit të Lumir Abdixhikut.
Sipas Rrustemit, PDK-ja po ushtron presion për të penguar çdo bashkëpunim, veçanërisht sa i përket arritjes së një marrëveshjeje për zgjedhjen e presidentit. Ai theksoi se pas certifikimit të rezultateve zgjedhore, është domosdoshmëri nisja e bisedimeve për krijimin e institucioneve të reja, duke fajësuar opozitën për krizën aktuale politike.
Deputeti deklaroi se zgjedhjet e fundit ishin të panevojshme dhe se, po të ishte pranuar oferta e Vetëvendosjes për bashkëqeverisje vitin e kaluar, vendi nuk do të kishte shkuar në zgjedhje të parakohshme. Ai shtoi se në 18 muajt e fundit, në Kosovë janë mbajtur pesë palë zgjedhje (tri palë zgjedhje parlamentare dhe dy palë zgjedhje lokale), gjë që ka ndikuar negativisht në pjesëmarrjen e qytetarëve në votime dhe ka prodhuar kosto të panevojshme.