Ruben Saraiva u dënua me burg të përjetshëm nga Gjykata e Lezhës për vrasjen me paramendim në bashkëpunim me të tjerë dhe posedimin e paligjshëm të armëve kundër biznesmenit Ardian Nikulaj. Ngjarja ndodhi më 19 prill 2023 në hotelin me pesë yje të Nikulajt në Shëngjin, ku Saraiva, i maskuar si shpërndarës, e qëlloi gjashtë herë. Gjykatësi Lirim Bulica e shpalli fajtor në një seancë me masa të rrepta sigurie.
Daily Mail publikoi foto nga gjykata ku Saraiva, i veshur me tuta të zezë, qëndronte në bankën e të akuzuarve me fasadë xhami, duke tundur kokën pas vendimit. Gazeta raporton se vrasësi kishte fluturuar nga Londra në Shqipëri dy muaj para krimit si anëtar kyç i një bande britanike, e cila përfshinte edhe një nënë të re nga Bristoli. Ata u angazhuan për 1 milion paund.
Prokurorët pretendojnë se porositësi i mundshëm është Edmond Haxhia, anëtar i një familjeje rivale shqiptare në Britaninë e Madhe. Motivi lidhet me një hasmëri midis familjes Nikulaj dhe fisit Lekstakaj, e nisur në vitin 1997, që ka zgjatur gati tre dekada dhe ka marrë 9 jetë. Nikulaj, baba i katër fëmijëve, dyshohet se kishte vrarë një të afërm të tyre më parë. Britanikët u zgjodhën pasi Nikulaj nuk do të dyshonte vizitorë nga Anglia.
Në operacion morën pjesë edhe shtetasit britanikë Stephen Hunt, Thomas Mithan, Harriet Bridgeman dhe Harry Simson. Daily Mail e përshkruan Saraivan si vrasës të rritur në Reading, Berkshire.