Gjykata e Lezhës dënoi Ruben Saraivën me burgim të përjetshëm për vrasjen e biznesmenit Ardian Nikulaj, të ekzekutuar me gjashtë plumba në barin e hotelit të tij në Shëngjin.
Familja e viktimës reagoi ekskluzivisht për Top Channel, duke e cilësuar vendimin si një hap përpara drejt drejtësisë, të cilin e prisnin prej kohësh. Ata theksojnë se vrasja ka lënë një plagë të thellë, veçanërisht për fëmijët e Nikulajt, të cilët rriten pa praninë e babait.
Sipas familjes, Nikulaj i trajtoi si miq shtetasit britanikë që erdhën në hotelin e tij, por dyshohen se kishin ardhur për ta survejuar para se Saraiva të kryente vrasjen. Familjarët shprehin shqetësimin se këta britanikë, si dhe urdhëruesit dhe financuesit, nuk kanë dalë ende para drejtësisë shqiptare.
Ata falënderojnë oficerët e Policisë së Lezhës për hetimin e vrasjes, zyrën e Interpol Tiranës dhe prokurorët për ekstradimin e Saraivës nga Maroku. Megjithatë, ngrenë shqetësim për vonesën në ekstradimin e pesë të arrestuarve britanikë në Angli që nga viti 2023, të cilët dyshohen si të përfshirë në krim.
Familja nënvizon se nuk do të ketë drejtësi të plotë pa identifikimin dhe ndëshkimin e porositësve dhe financuesve. Hetimet e Prokurorisë së Lezhës kanë ngritur pista për ta, por provat mungojnë ende për t’i çuar ata para gjykatës.