Rudina Hajdari, ish-deputete e Partisë Demokratike, u bëri thirrje studentëve dhe protestuesve të pranojnë dialogun me kryeministrin Edi Rama. Më 22 tetor, ajo publikoi një fotografi nga takimi i përfaqësuesve të studentëve me Ramiz Alinë, në dhjetor të vitit 1990, dhe u kërkoi protestuesve të hyjnë në bisedime duke mbrojtur kërkesat e tyre.
“Uluni në dialog, por me transparencë, jo pas dyerve të mbyllura. Mos i humbni këto mundësi! Unë do të ulesha e para në ato karrige dhe do të përballesha drejtpërdrejt me Ramën. Ai nuk ka si të mbrohet përballë argumenteve tuaja. I keni të gjitha argumentet për të arritur maksimumin e kërkesave tuaja”, shkroi Hajdari.
Ajo e lidhi mesazhin me përvojën e të atit, Azem Hajdarit, një nga drejtuesit e Lëvizjes Studentore të Dhjetorit 1990. Në takimin me Alinë, përfaqësuesit studentorë kërkonin, ndër të tjera, formulimin e qartë të pluralizmit politik. Sipas raportimeve, Azem Hajdari e shihte dialogun si mënyrë për të mbrojtur kërkesat e studentëve, jo si tërheqje prej tyre.
Në fjalën e tij në takim, Hajdari tha se studentët kërkonin që biseda të regjistrohej dhe të transmetohej, në mënyrë që ta dëgjonin edhe studentët. Ai shpjegoi se programi ishte diskutuar dhe miratuar me ta dhe se përfaqësuesit kishin mandatin për ta mbrojtur në dialog, duke paraqitur argumente për secilën pikë.
Ai theksoi gjithashtu se studentët duhej të këmbëngulnin në proceset demokratike, edhe pse ishin të gatshëm të dialogonin. Në mesazhin e saj, Rudina Hajdari tha se, nëse studentët nuk ulen në tryezë, dikush tjetër mund ta zhvillojë dialogun në emër të tyre.