Zëvendësministrja e Brendshme, Anisa Ruseti, u bëri thirrje të rinjve të largohen nga aktet e dhunshme gjatë protestës në Tiranë dhe kujtoi se të miturit mund të mbajnë përgjegjësi penale. Në deklaratën për mediat më 19 tetor, ajo tha se, sipas Kodit Penal, përgjegjësia penale për krimet nis në moshën 14 vjeç, ndërsa për kundërvajtjet penale në moshën 16 vjeç.
Ruseti tha se, pavarësisht akteve të veçuara të dhunës të regjistruara deri në orët e pasdites, përfshirë sulmin ndaj Gjykatës së Apelit në Tiranë, situata ishte nën kontroll dhe Policia e Shtetit po garantonte rendin dhe sigurinë publike. Ajo shtoi se disa të rinj vijonin të përfshiheshin në veprime të dhunshme.
Sipas zëvendësministres, e drejta për të protestuar nuk i përjashton individët nga përgjegjësia për dhunën ndaj qytetarëve dhe punonjësve të policisë, dëmtimin e pronës publike ose private, zjarrvënien, vjedhjen dhe mbajtjen e paligjshme të armëve apo mjeteve shpërthyese. Ajo tha se përgjegjësia do të vlerësohet individualisht, mbi bazën e veprimeve dhe provave për secilin person, duke respektuar prezumimin e pafajësisë. Pjesëmarrja në të njëjtën protestë, theksoi ajo, nuk e bën askënd përgjegjës për veprimet e të tjerëve.
Ruseti falënderoi prindërit dhe kujdestarët që iu përgjigjën thirrjes së ministrisë dhe shoqëruan fëmijët në shkollë. Sipas saj, bashkëpunimi me familjet dhe mësuesit ndihmoi që nxënësit të vijonin mësimin dhe të mos përfshiheshin në një protestë ku ekzistonte rreziku i përplasjeve të dhunshme.
Ajo tha se interesi më i lartë i fëmijës, e drejta për mbrojtje dhe trajtimi me dinjitet do të udhëheqin veprimet e institucioneve. Ruseti u kërkoi të rinjve pranë zonave të përplasjeve të largohen nga dhuna dhe ta ushtrojnë të drejtën e protestës në mënyrë paqësore e me përgjegjësi. Prindërve dhe kujdestarëve u kërkoi të vijojnë bashkëpunimin me institucionet dhe të flasin me fëmijët për pasojat ligjore, fizike dhe psikologjike të dhunës.