Policia u bën thirrje prindërve të mbrojnë të miturit

Policia e Shtetit njoftoi më 15 tetor se ka konstatuar pjesëmarrjen e një numri të konsiderueshëm të miturish në protestat e ditëve të fundit dhe u bëri thirrje prindërve e kujdestarëve ligjorë t’i mbrojnë. Sipas deklaratës së policisë, në disa raste fëmijët janë gjendur në vijën e parë të përplasjeve, të ekspozuar ndaj akteve të dhunës, sendeve të forta të hedhura dhe mjeteve të përdorura nga policia për menaxhimin e situatës.

Policia u kërkoi prindërve të interesohen për vendndodhjen e fëmijëve dhe të mos lejojnë që ata të ekspozohen ndaj rreziqeve për jetën e shëndetin. Ajo theksoi se duhet kontrolluar ku ndodhen fëmijët, veçanërisht kur mungojnë në shkollë, dhe përmendi rrezikun nga gurët, mjetet piroteknike dhe gazi lotsjellës. Ministrja e Arsimit, Mirela Kumbaro, u bëri thirrje nxënësve dhe prindërve të distancohen nga aktet e dhunshme. Ajo tha se mësimi vijon në shumë shkolla dhe se nxënësit e studentët nuk janë ata që shkatërrojnë bizneset.

Ministri Taulant Balla u bëri thirrje prindërve të mos lejojnë që fëmijët të përdoren për agjenda dhune dhe shkatërrimi. Ai pretendoi gjithashtu se turistët ishin frikësuar dhe ishin strehuar brenda një kishe.

Policia shprehu shqetësim për raste të dyshuara të përdorimit të të miturve në vijën e parë të përplasjeve për qëllime të caktuara. Sipas deklaratës, çdo rast i dyshuar i nxitjes, organizimit ose shfrytëzimit të tyre për veprime të kundërligjshme do të dokumentohet dhe do t’u referohet institucioneve kompetente, në përputhje me ligjin.

Policia e Shtetit tha se respekton dhe garanton të drejtën për protestë paqësore, përfshirë të drejtat e të miturve, dhe se do të marrë masat e nevojshme e proporcionale për të mbrojtur jetën dhe sigurinë e tyre. Ajo u bëri thirrje pjesëmarrësve në tubime të distancohen nga personat e maskuar dhe të dhunshëm, të mos bëhen pjesë e akteve të dhunës e të shkatërrimit dhe të shmangin dhunën ndaj punonjësve të policisë, institucioneve dhe pronës publike e private.