Ministria e Jashtme e Rusisë ka njoftuar mbylljen e konsullatës së Rumanisë në Shën Petersburg dhe dëbimin e konsullit të përgjithshëm rumun. Ky veprim është ndërmarrë si kundërpërgjigje ndaj vendimit të autoriteteve rumune për të mbyllur konsullatën ruse në Konstancë, masë të cilën Moska e ka cilësuar si jomiqësore.
Nga ana tjetër, Ministria e Jashtme e Rumanisë deklaroi se reagimi i autoriteteve ruse ishte i pritshëm pas dëbimit të konsullit rus nga territori i saj. Marrëdhëniet mes dy vendeve janë acaruar ndjeshëm pas incidentit të regjistruar në muajin maj, kur një dron rus u rrëzua mbi një ndërtesë apartamentesh në qytetin e Galatit, gjatë një sulmi ajror ndaj Ukrainës.
Ngjarja në Galat shënoi një precedent të rëndësishëm, pasi ishte hera e parë që një zonë me popullsi të dendur në territorin e një vendi anëtar të NATO-s goditej gjatë luftës, duke shkaktuar persona të plagosur. Analistët vlerësojnë se këto masa të ndërsjella diplomatike pritet të thellojnë përplasjet mes Rusisë dhe vendeve anëtare të Aleancës së Atlantikut të Veriut.