Rusia dhe Ukraina kanë shkëmbyer sulme të mëdha me dronë gjatë natës së fundit, menjëherë pas bisedimeve midis përfaqësuesve të Shteteve të Bashkuara dhe Ukrainës në Floridë. Secila palë përdori mbi 200 dronë, sipas deklaratave zyrtare.
Forcat e Mbrojtjes së Russisë njoftuan se kapën dhe shkatërruan 249 dronë ukrainas. Ky sulm konsiderohet ndër më të mëdhatë nga ana e Ukrainës, e cila ka intensifikuar goditjet ndaj caqeve energjetike ruse.
Ndërkaq, Forcat Ajrore të Ukrainës raportuan se forcat ruse lëshuan 251 dronë sulmues gjatë të njëjtës periudhë.
Goditjet në Ukrainë
Dronët rusë goditën zona banimi dhe infrastrukturën e portit në rajonin jugor të Odesës në Detin e Zi, sipas guvernatorit rajonal. Në qytetin industrial Kryvy Rih në Ukrainën qendrore u plagosën të paktën 4 persona, ndërsa u raportuan zjarre dhe dëme në infrastrukturë.
Goditjet në Rusi
Një sulm ukrainas me dronë shkaktoi zjarr në një rezervuar karburanti në portin e Primorskit në Detin Baltik, qendra kryesore perëndimore e eksportit të naftës. Guvernatori i rajonit të Leningradit, Aleksandr Drozdenko, shkroi në Telegram se mbi 70 dronë u shkatërruan në rajon gjatë 24 orëve të fundit.
Porti i Primorskit ka kapacitet eksporti mbi 1 milion fuçi naftë bruto në ditë dhe shërben si dalje e rëndësishme për naftën ruse të papërpunuar. Ky nuk është sulmi i parë: porti u godit në shtator 2025, duke ndërprerë përkohësisht ngarkesat e naftës. Ukraina vazhdon sulmet ndaj infrastrukturës energjetike ruse për të dobësuar ekonominë e luftës së saj.
Bisedimet në Floridë
Ekipi negociator i Ukrainës u takua me përfaqësues amerikanë në Floridë për dy ditë bisedimesh më 21-22 mars. Delegacioni i SHBA-së përfshinte të dërguarin special Steve Witkoff, Jared Kushner dhe këshilltarë të tjerë. Ndërmjet temave u diskutua shkëmbimi i mundshëm i të burgosurve midis Russisë dhe Ukrainës.