Deputeti i Lidhjes Demokratike të Kosovës (LDK), Ermal Sadiku, deklaroi se partia e tij kishte 15 vota të gatshme për rizgjedhjen e Vjosa Osmanit si presidente të Kosovës. Deklarata u bë më 8 prill 2026, në emisionin Debat Plus.
Sipas Sadikut, Vjosa Osmani nuk u paraqit si kandidate nga Lëvizja Vetëvendosje (LVV). Për ta propozuar atë vetë, LDK-së i duheshin të paktën 30 nënshkrime, numër që nuk e kishte.
Ai përmendi se kryeministri Albin Kurti kërkon 84-85 vota për kandidatin e tij. Sadiku theksoi nevojën për të intensifikuar procesin e zgjedhjes së presidentit dhe për ta shmangur lënien e tij për momentet e fundit.
"Është e vërtetë që Kurti po i kërkon 84-85, nuk i kemi ne, i kemi 15, këto 15 i kemi pasur të gatshme për Vjosa Osmanin, nuk u paraqit si kandidaturë, nuk kemi mundur ta propozojmë, nevojiteshin 30. Tash po presim, mendoj se duhet çdo ditë të intensifikohet procesi i gjetjes së zgjidhjes, nuk ka nevojë të lihet për ditët e fundit. Vendi ka nevojë të vazhdojë punët të zhvillohet", u shpreh Sadiku.