Kryetari i Partisë Demokratike, Sali Berisha, ka njoftuar heqjen e kufizimeve të udhëtimit drejt Shteteve të Bashkuara të Amerikës, pas më shumë se pesë vitesh. Berisha pohoi se ky sanksion nuk ka ekzistuar asnjëherë në thelb, megjithatë nuk sqaroi nëse vendimi shtrihet edhe për familjarët e tij.
Pas bërjes publike të këtij zhvillimi, në grupin e komunikimit në WhatsApp të deputetëve të PD-së janë shpërndarë mesazhe të shumta urimi. Deputeti Arjan Ndoji shkroi: "Urime Doktor. Për të gjithë ata që brenda forcës thanë që mbron veten nëpërmjet Partisë, i përshëndesim dhe i urojmë të mos nguten në jetë. Për të gjithë anëtarët e PD-së kjo është fitore dhe duhet kapitalizuar në proces pune të përditshme".
Në këto komunikime u përfshi edhe deputeti Tritan Shehu, i cili theksoi se "e vërteta mund të vonojë, por vjen kur luftohet për atë. U luftua dhe u fitua".
Këto reagime vijnë pas një periudhe të gjatë akuzash të brendshme, ku disa deputetë, mes të cilëve edhe Gazment Bardhi, e kishin kritikuar më parë Berishën se po përdorte strukturat e partisë për t'u mbrojtur nga sanksionet. Këto mosmarrëveshje u shuan kur Berisha mori ligjërisht drejtimin e partisë dhe deputetët që mbështetnin ish-kryetarin Lulzim Basha u bashkuan me grupin e tij.