Ish-deputeti i Partisë Demokratike (PD), Ervin Salianji, zhvilloi më 18 shkurt 2026 një takim me bazën e partisë në Berat. Gjatë fjalës së tij, ai theksoi se demokratët vuajnë prej 13 vitesh humbje të njëpasnjëshme dhe lidershipi nuk ka mbajtur përgjegjësi.
Salianji akuzoi disa drejtues se ndihen mirë në selinë blu, sepse marrin rrogë prej vitesh dhe e përdorin partinë për përfitime personale. Ai nënvizoi se PD mbetet forca opozitare më e fortë, por duhet të bëhet fituese dhe qeveritare. "Historia jep respekt, por ndryshimi jep të ardhme", tha ai.
Ai kritikoi Sali Berishën, kryetarin aktual, duke e krahasuar me ish-kryetarin Lulzim Basha, të cilin e quajti "birin politik". Sipas Salianjit, të dy ndjekin të njëjtin kurs të dështuar: zgjedhje të gabuara deputetësh, mosrespekt ndaj votës së demokratëve si në Primaret dhe mbyllje të partisë ndaj të rinjve. "Çfarë ka ndryshuar përveç emrave? Asgjë, ose është përkeqësuar", deklaroi ai.
Salianji hodhi poshtë tezën se Edi Rama nuk mund të rrëzohet me votë. "Rama përmbyset me votë, nga fuqia e njerëzve të bashkuar, me ndihmën e SPAK, SHBA-së dhe BE-së. Llogaritë përfundimtare bëhen në kutitë e votimit", u shpreh ai. Ai kërkoi bashkimin e opozitës dhe PD-së për të rrëzuar regjimin e konsideruar kriminal dhe të korruptuar.
Ai paralajmëroi se shqiptarët dhe demokratët do të urrejnë PD-në nëse nuk ndryshon dhe nuk fiton. "Kush mendon ndryshe janë dokrra dhe zvarritja e opozitës me ta është papërgjegjësi ekstreme", shtoi Salianji, duke theksuar se partia nuk ka luksin të përjashtojë njerëz.