Sara Mila, deputete e Partisë Socialiste të Shqipërisë, zhvilloi një takim me të rinjtë e Komunës së Preshevës në kuadër të turit rajonal EUth Balkans - Regional Youth Consultation Tour. Ngjarja u zhvillua më 18 janar 2026.
Në fokus të diskutimeve ishte përfshirja e të rinjve në proceset e vendimmarrjes, fuqizimi i bashkëpunimit rajonal dhe shfrytëzimi i mekanizmave evropianë për zhvillim të qëndrueshëm. Deputetja Mila ndau përvojën personale në rrugëtimin e saj politik, duke e paraqitur si shembull për të rinjtë, veçanërisht për vajzat me ambicie politike.
Ajo theksoi: “Njerëzit patën besimin që një vajzë e re, një format i ri, një njeri i thjeshtë që ka shumë dëshirë dhe ka një lloji energjie dhe çiltërsie mund të jetë shumë më mirë se xhaketat e vjetra. Ajo çfarë dua të arrij në këtë 4 vjeçarin timin të parë si deputete, është dëshira dhe angazhimi për t'u dhënë një dorë të rinjve, sidomos vajzave të reja, sepse e di që udhëtimi im në politikë nuk ka qenë perfekt, por e di që nuk ka qenë dhe shumë i vështirë apo i pamundur.”
Mila u shoqërua nga Gjergji Ogreni, ekspert komunikimi me fokus te çështjet e të rinjve, dhe Ernest Hasani, ekspert i fondeve të Bashkimit Evropian për projektet. Ata vunë në dukje se shkëmbimi i ideve mes të rinjve të rajonit është thelbësor për të ardhmen e përbashkët.
Gjatë takimit, deputetja hodhi idenë e organizimit të një samiti të të rinjve të Ballkanit Perëndimor. Ajo deklaroi: “Unë kam shumë dëshirë që siç jemi këtu t'ju shoh dhe në Tiranë, në Elbasan e në çdo qytet ku do shkojmë, ku jemi duke menduar dhe planifikuar që në fund të këtij dialogu dhe turi të madh të mund të bëjmë një samit të mirëfilltë të të rinjve të Ballkanit Perëndimor dhe të mund të arrijmë në të shkruar të disa marrëveshjeve, iniciativa që të jenë të realizueshme që sot.”
Në kuadër të kësaj nisme, Sara Mila u takua edhe me kryetaren e Komunës së Preshevës, Ardita Sinani, ku diskutuan krijimin e mundësive konkrete për të rinjtë dhe rolin e tyre në politikën publike.