Shërbimet e Policisë Kufitare kanë ndërmarrë masa ndaj drejtuesit të një mjeti lundrues në Sarandë, pasi ky i fundit u konstatua duke lundruar brenda zonës së ndaluar për pushuesit. Sipas njoftimit zyrtar, mjeti u fut në perimetrin e sigurisë në një kohë kur zona ishte e frekuentuar, duke rrezikuar drejtpërdrejt jetën e pushuesve.
Pas ndërhyrjes, mjeti u shoqërua drejt portit të Sarandës, ku mbetet i bllokuar deri në përfundim të procedurave ligjore. Kontrollet e ushtruara zbuluan se mjeti nuk ishte i regjistruar sipas afateve të përcaktuara nga ligji dhe se poseduesit i mungonte dokumentacioni i domosdoshëm për lundrim.
Si pasojë e shkeljeve, ndaj pronarit është vendosur një masë administrative me vlerë 530.000 lekë të rinj. Policia e Shtetit u ka bërë apel përdoruesve të mjeteve lundruese dhe operatorëve ekonomikë që t'i përmbahen rregullave të lundrimit dhe të respektojnë hapësirat e përcaktuara për sigurinë e pushuesve përgjatë vijës bregdetare.