Pas një hetimi intensiv, shërbimet e Komisariatit të Policisë Sarandë kanë goditur një grup kriminal që kryente vjedhje me thyerje. Në pranga kanë rënë shtetasit Sherif Dafku (33 vjeç), banues në Durrës, si dhe Blerim Allaraj (27 vjeç), Belik Cengu (32 vjeç) dhe Eusedio Dumbollari (30 vjeç), këta të tre banues në Tiranë. Ndërkohë, policia ka shpallur në kërkim shtetasin Olsi Shehu (39 vjeç), banues në Fier.
Sipas njoftimit zyrtar, të dyshuarit kanë kryer vjedhje me thyerje në pesë automjete, duke thyer xhamat e tyre, si dhe në një banesë. Nga këto veprime, janë përvetësuar shuma parash, pajisje elektronike si laptopë dhe tableta, sende me vlerë, si dhe dokumente personale. Gjatë operacionit, forcat e rendit kanë sekuestruar si prova materiale një laptop, një telefon celular dhe një automjet, i cili dyshohet se është përdorur për kryerjen e veprimtarisë kriminale.
Materialet procedurale i janë kaluar Prokurorisë për hetime të mëtejshme. Policia po vijon punën për kapjen e personit të shpallur në kërkim dhe për zbardhjen e plotë të veprimtarisë së këtij grupi, me qëllim identifikimin e rasteve të tjera të mundshme të vjedhjeve të kryera nga të njëjtët autorë.