Pas trajtimit të specializuar në spitalin e Janinës, 50-vjeçari Thimjo Rubati ndodhet jashtë rrezikut për jetën. Mjekët konstatuan se ai ishte goditur nga 3 plumba, dy prej të cilëve në afërsi të mëlçisë dhe një në pjesën e kërbishtit. Pacienti kishte marrë ndihmën e parë në spitalin e Sarandës, ku iu nënshtrua procedurave të nevojshme mjekësore, përfshirë dhënien e dy flakonëve me gjak, përpara transferimit në Greqi.
Grupi hetimor ka vijuar punën në vendin e ngjarjes për të mbledhur prova materiale. Hetuesit janë përqendruar në analizimin e pamjeve të siguruara nga kamerat e sigurisë, si dhe në marrjen në pyetje të personave që mund të kenë dijeni mbi rrethanat e ngjarjes. Autorët dyshohet se kanë qëlluar gjithsej 9 herë drejt Thimjo Rubatit përpara se të largoheshin nga vendi i ngjarjes.