Autoritetet shëndetësore në Cagliari, kryeqyteti i ishullit të Sardenjës në Itali, kanë vënë në zbatim protokollin e emergjencës pas identifikimit të një rasti të dyshuar me virusin e Ebolës. Bëhet fjalë për një person, i cili kishte shfaqur simptoma pas një udhëtimi të kohëve të fundit jashtë vendit.
Pas sinjalizimit, ekipet mjekësore, policia dhe zjarrfikësit ndërhynë në banesën e personit, duke zbatuar masat e sigurisë dhe izolimit. Mjekët dhe infermierët, të pajisur me veshje mbrojtëse, bënë të mundur transportimin e pacientit në Qendrën e Sëmundjeve Infektive të spitalit Santissima Trinità.
Personi po i nënshtrohet analizave laboratorike për të vërtetuar nëse bëhet fjalë për një rast të konfirmuar me virusin Ebola. Autoritetet italiane vijojnë monitorimin e situatës, ndërsa priten rezultatet përfundimtare të testeve.