Sot, më 15 prill 2026, zhvillohet seanca e radhës e gjyqit në themel ndaj kryebashkiakut të Tiranës Erion Veliaj në Gjykatën e Përgjithshme të Krimeve të Rënda (GJKKO).
Të pranishëm janë prokurorët e çështjes Olsi Dado dhe Altin Dumani, si dhe avokati i të pandehurit Plarent Ndreca, ish-deputet i Partisë Socialiste.
Veliaj ndodhet në masën e arrestit me burg që prej 10 shkurt 2025. Struktura e Posaçme Kundër Korrupsionit dhe Krimit të Organizuar (SPAK) ka ngritur ndaj tij 13 akuza, duke përfshirë korrupsion pasiv në 9 raste, pastrim parash, mosdeklarim pasurie, shpërdorim detyre dhe futjen e sendeve në burg.
Seanca e mëparshme u mbajt më 3 prill 2026, kur trupa gjyqkësore i dha avokatit Ndreca një afat dyjavor për t’u njohur me dosjen hetimore.
Në atë seancë, biznesmeni Elman Abule, Mirton Lika dhe ish-deputetja socialiste Klotilda Bushka kërkuan ndarjen e çështjes dhe gjykimin në një gjykatë tjetër, jo në GJKKO. Avokati i Bushkës argumentoi se çështja duhet të shqyrtohet diku tjetër, për shkak se ajo nuk është më deputete.
Krahas Veliajt dhe bashkëshortes së tij Ajola Xoxa, në këtë dosje janë të përfshirë edhe 28 persona të tjerë dhe shoqëri.
Përditësime
GJKKO ka nisur seancën e radhës ndaj Erion Veliajt. Avokati i tij Ndreca pritet të deklarohet mbi mjaftueshmërinë e 14 ditëve për të studiosur dosjen e inceneratorit, që numëron 28 mijë faqe në 72 fashikuj. SPAK e kishte kundërshtuar më parë Ndrecën, pasi ai u pyet si dëshmitar gjatë hetimit. Ndreca pretendon mungesë mbrojtjeje efektive.