Ka nisur seanca e radhës në Gjykatën e Posaçme Kundër Korrupsionit dhe Krimit të Organizuar (GjKKO) për kryebashkiakun e Tiranës Erion Veliaj dhe 29 të bashkëpandehurit e tjerë. Bëhet fjalë për seancën e dytë në ngarkim të tyre.
Veliaj nuk është paraqitur fizikisht në seancë. Ai ka deklaruar: "Nuk dua të paraqitem sot në këtë seancë dhe dua të përfaqësohem nga avokati im Plarent Ndreca". Avokati Plarent Ndreca është i pranishëm si mbrojtës ligjor i tij.
Prokuroria e Posaçme Kundër Korrupsionit dhe Krimit të Organizuar (SPAK) përfaqësohet nga prokurorët e posaçëm Altin Dumani dhe Ols Dado. E pranishme është gjithashtu avokatja kryesore Valentina Todoresku.
Sipas aktakuzës së SPAK-ut, Veliaj dhe persona të tjerë akuzohen për ngritjen e një skeme për përfitimin e ryshfeteve në këmbim të favoreve ndaj biznesmenëve për leje ndërtimi. Veliaj akuzohet konkretisht për 5 vepra penale: korrupsion pasiv në 9 episode, shpërdorim detyre, mosdeklarim dhe fshehje pasurie, pastrim parash si dhe futje të sendeve të palejuara në burg.
Seanca zhvillohet në themel të çështjes penale.
Përditësime
Gjykata e GjKKO-së refuzoi kërkesën e prokurorit Altin Dumani për të përjashtuar avokatin Plarent Ndrecën nga mbrojtja e Erion Veliajt. Dumani argumentoi se Ndreca është pyetur në këtë procedim penal.
Gjykata:
- Konfirmoi Ndrecën si avokat të Veliajt pavarësisht kundërshtimit të SPAK-ut.
- Shtyu seancën për 1 prill, pasi Meriman Palushi mbetet pa avokat.
- Pezulloi afatet e paraburgimit për Veliajt dhe bashkëpandehurit.
Veliaj nuk ka nënshkruar refuzimin e dosjes në IEVP Durrës. Ajola Xoxa figuron si bashkëpandehur.