Ergis Sefa, ekspert i ekonomisë, dënoi aktet e dhunës dhe dëmtimin e pronës publike e private gjatë protestave, duke thënë se pasojat prekin drejtpërdrejt qytetarët dhe ekonominë. Ai foli për këtë çështje në emisionin “3D” me Alban Dudushin. Sipas Sefës, prona publike u përket qytetarëve dhe dëmtimi i saj krijon kosto për të gjithë shoqërinë.
Sefa tha se në Shqipëri mbizotërojnë bizneset e vogla dhe familjare, të cilat mbajnë një numër të madh familjesh. Për këtë arsye, sulmet ndaj tyre përbëjnë goditje për ekonominë dhe nuk lidhen me debatet politike apo qeverisjen. Ai ngriti dyshime se dëmtimet në disa biznese dhe pika strategjike të kryeqytetit mund të mos kenë qenë të rastësishme, duke përmendur Zogun e Zi, 21 Dhjetorin dhe Brylin.
Sipas ekonomistit, këto zona janë nyje të lëvizjes së qytetarëve dhe pika kyçe për qarkullimin e mallrave e shërbimeve. Bllokimi i tyre mund të vështirësojë furnizimin e tregut, veçanërisht në një ekonomi që mbështetet te importet për një pjesë të konsiderueshme të produkteve bazë.
Sefa ngriti shqetësimin edhe për dëmtimin e sistemit financiar. Ai tha se bankat, ATM-të dhe infrastruktura financiare janë jetike, pasi përmes tyre shpërndahen pagat, pensionet dhe ndihmat ekonomike. Sipas tij, nëse sulmet do të kishin ndodhur në fund të muajit ose në fillim të muajit pasardhës, situata mund të ishte bërë shumë më problematike për familjet.
Ai paralajmëroi se dëmtimi i ATM-ve dhe përhapja e pasigurisë mund të krijojnë panik dhe të nxisin tërheqje masive të parave. Një valë tërheqjesh të depozitave mund të sjellë pasoja negative për ekonominë dhe të kërkojë muaj për t’u rikuperuar, tha Sefa.
Sefa pranoi se pakënaqësitë sociale dhe ekonomike janë reale. Ai tha se Tirana ka përjetuar një nga ritmet më të larta të rritjes së kostos së jetesës në rajon dhe se blerja e një banese është bërë gjithnjë e më e vështirë për çiftet e reja. Megjithatë, sipas tij, dëmtimi i pronës private nuk është mënyrë për të ushtruar presion ndaj qeverisë. Pronarët e bizneseve të vogla janë taksapagues dhe nuk kanë lidhje me vendimmarrjen politike, tha ai.