Jorida Tabaku, deputete e Partisë Demokratike, zhvilloi një takim në zonën e Saukut në Tiranë me qytetarë, biznese, pensionistë, të rinj dhe familjarë. Takimi zgjati më shumë se një orë dhe u publikua në rrjetet sociale.
Sipas saj, shqetësimi kryesor ishte i njëjtë te të gjithë: rënia e konsumit, varfërimi i qytetarëve dhe pamundësia për të përballuar jetesën me punë të ndershme. Tabaku theksoi se qytetarët konsumojnë më pak, bizneset shesin më pak dhe kriza e besimit në ekonomi reflektohet në çdo tregues ekonomik.
Ajo vuri në dukje se edhe zona pranë qendrës së Tiranës, jo tradicionalisht të varfra, po përballen me të njëjtat vështirësi si në të gjithë Shqipërinë. "Ekonomia shqiptare po lëngon", deklaroi Tabaku, duke akuzuar qeverinë se punon për një pakicë dhe jo për shumicën e qytetarëve.
Deputetja e PD-së shtoi se Shqipëria është bërë vendi i pakicës dhe se është pothuajse e pamundur të jetosh me dinjitet nga puna e ndershme në Tiranë apo qytete të tjera. Ajo bëri thirrje për ndryshim të modelit ekonomik dhe politik, që Shqipëria të bëhet vend i mundësive për çdo qytetar.
Tabaku lidhi mesazhin me protestën e opozitës të planifikuar më 8 maj, duke ftuft qytetarët të marrin pjesë për të ndryshuar sistemin.