Jorida Tabaku, deputete e Partisë Demokratike, ka reaguar në rrjetet sociale kundër politikës fiskale të qeverisë. Ajo e cilëson sistemin aktual si të padrejtë, që rëndon mbi shumicën e qytetarëve, veçanërisht shtresën e mesme.
Sipas Tabakut, sa më shumë punon dikush, aq më shumë taksohet. Ky model mbitakson ata që krijojnë vlerë të shtuar në ekonomi, ndërsa një pakicë përfiton lehtësira fiskale me ligje të veçanta. Ajo shton se barra më e madhe e taksave bie mbi djersën e punës së qytetarëve, duke ulur të ardhurat reale të familjeve dhe fuqinë blerëse.
Tabaku lidh sistemin fiskal me korrupsionin, monopolizimin e tregut dhe orientimin e fondeve publike drejt projekteve ineficiente pa vlerë të shtuar. Shtresa e mesme paguan faturat e projekteve korruptive dhe koncesioneve. Për pasojë, Shqipëria mbetet vendi më i varfër në rajon me fuqinë blerëse më të ulët, pasi 95% e shqiptarëve paguajnë më shumë taksa, përballen me çmime më të larta dhe marrin më pak të ardhura.
Deputetja e PD-së akuzon Partinë Socialiste se mbron këtë sistem për të mbajtur pushtetin, duke zgjedhur interesin e tij para qytetarëve. Ajo bën thirrje për ndryshim politik për të ndërtuar një qeverisje me interesin e qytetarëve në qendër dhe për të tharë moçalin e këtij modeli.