Deputetja e Partisë Demokratike dhe kryetarja e Komisionit për Median dhe të Drejtat e Njeriut, Jorida Tabaku, ka reaguar pas protestës qytetare të zhvilluar të shtunën në bulevardin “Dëshmorët e Kombit”. Përmes një deklarate, ajo e përshkroi tubimin si një mesazh të qartë kundër modelit aktual të qeverisjes.
Sipas Tabakut, pjesëmarrja masive në shesh dëshmoi pakënaqësinë e gjerë ndaj korrupsionit, privilegjeve për një pakicë dhe kapjes së shtetit. Ajo theksoi se protesta nuk ishte një tubim thjesht partiak, por një bashkim i qytetarëve nga shtresa të ndryshme sociale, duke përfshirë të rinj, pensionistë dhe përfaqësues të shtresës së mesme, të cilët përballen me kosto të larta jetese dhe pabarazi ekonomike.
"Shqipëria që është lodhur nga korrupsioni, arroganca dhe nga një sistem ku ligjet shkruhen për pakicën dhe faturën e paguan shumica", u shpreh deputetja demokrate. Ajo shtoi se legjitimiteti moral i kryeministrit Edi Rama dhe arroganca e qeverisjes kanë hyrë në fazën e fundit.
Deputetja Tabaku kritikoi gjithashtu përpjekjet e qeverisë për të delegjitimuar protestuesit pas përfundimit të tubimit, duke i cilësuar ato si një mekanizëm propagandistik që synon t'i shmanget problemeve reale. Ajo nënvizoi se hendeku midis qeverisë dhe qytetarëve është thelluar ndjeshëm dhe se besimi i publikut nuk mund të zëvendësohet me propagandë.