Deputetja e Partisë Demokratike, Jorida Tabaku, ka reaguar ashpër ndaj qasjes së Kryeministrit Edi Rama ndaj qytetarëve që marrin pjesë në protestat e fundit. Sipas saj, kreu i qeverisë po shfrytëzon të dhënat personale dhe strukturat shtetërore për të identifikuar, kërcënuar dhe ekspozuar publikisht protestuesit.
Tabaku e cilësoi faqen zyrtare të Kryeministrit si një "tabelë dazibao" dixhitale, ku qytetarët që kundërshtojnë qeverinë vihen në shënjestër. Ajo e konsideron këtë një rikthim të metodave të vjetra të përndjekjes politike, ku informacione nga gjendja civile dhe administrata kthehen në armë për të mbrojtur pushtetin.
Deputetja demokrate vuri në dukje një kontrast midis gatishmërisë së qeverisë për të hetuar biografitë e protestuesve dhe qëndrimit të saj ndaj skandaleve të korrupsionit. Tabaku kujtoi se Kryeministri ka deklaruar shpesh mosdije në rastet e ish-zëvendëskryeministrave, ish-ministrave apo kryetarëve të bashkive të përfshirë në procese gjyqësore.
"Sistemi duhej të fshihej, ndërsa individi i radhës shpallej kurban. Sot, kur rrezikohet vetë koka e sistemit, maska ka rënë", thekson Tabaku, duke shtuar se pushteti po ndërmerr fushata përndjekjeje ndaj qytetarëve, të cilët ajo i cilësoi si "heronj të Shqipërisë".