Guvernatori i Bankës së Shqipërisë, Gent Sejko, u takua më 5 nëntor me Piero Cipollone, anëtar të Bordit Ekzekutiv të Bankës Qendrore Evropiane (BQE). Cipollone ndodhet në Shqipëri për të marrë pjesë në Konferencën e 8-të Ndërkombëtare të Skemave Rajonale të Kartave dhe Infrastrukturave të Tregut Financiar për Pagesat me Vlerë të Vogël.
Sejko vlerësoi bashkëpunimin ndërmjet Bankës së Shqipërisë dhe BQE-së, si dhe rolin e kësaj të fundit në procesin e integrimit evropian të Shqipërisë. Ai tha se përafrimi i legjislacionit dhe i kuadrit rregullator në fushat e kompetencës së bankës me acquis-në e Bashkimit Evropian është përparësi institucionale. Sipas tij, procesi përfshin përmirësimin e kuadrit ligjor, forcimin e kapaciteteve zbatuese dhe përvetësimin e praktikave më të mira evropiane, me synimin për të mbështetur përmbushjen e detyrimeve të procesit të anëtarësimit dhe integrimin e sistemit financiar me tregun evropian.
Gjatë takimit, Sejko paraqiti zhvillimet ekonomike në vend. Ai tha se ekonomia shqiptare ka vijuar të shfaqë qëndrueshmëri dhe performancë pozitive. Zgjerimi i aktivitetit ekonomik mbështetet nga konsumi, investimet, turizmi dhe një sektor bankar i shëndetshëm, ndërsa inflacioni është rikthyer pranë objektivit të Bankës së Shqipërisë.
Modernizimi i pagesave
Një pjesë e bisedës iu kushtua modernizimit të infrastrukturës së pagesave, me synim rritjen e efikasitetit, uljen e kostove dhe zgjerimin e aksesit të qytetarëve e bizneseve në shërbimet financiare. Sejko tha se pjesëmarrja e Shqipërisë në Zonën Unike të Pagesave në Euro (SEPA) ka ulur kostot dhe kohën e transfertave, si dhe ka nxitur përdorimin e kanaleve digjitale dhe të pagesave formale.
Ai foli edhe për projektin TIPS Clone, i cili synon krijimin e një platforme kombëtare për pagesa të menjëhershme, në përputhje me standardet evropiane. Platforma do të mundësojë transaksione në kohë reale, 24 orë në ditë dhe shtatë ditë në javë, si dhe do të krijojë kushte për zgjerimin e pagesave ndërkufitare. Sejko vlerësoi mbështetjen e Bankës së Italisë dhe kontributin e Cipollone në nismë.
Cipollone vlerësoi angazhimin e Bankës së Shqipërisë për modernizimin e tregut të pagesave dhe përafrimin me standardet evropiane. Ai nënvizoi rëndësinë e shërbimeve financiare të sigurta, efikase dhe të aksesueshme, si dhe të bashkëpunimit institucional.
Në takim u diskutua edhe rëndësia e pavarësisë së bankës qendrore për përmbushjen e mandatit të saj, ruajtjen e stabilitetit të çmimeve dhe forcimin e besimit të publikut. Cipollone tha se pavarësia është thelbësore për autoritetin, besueshmërinë dhe reputacionin institucional të bankave qendrore. Ai vlerësoi gjithashtu përafrimin e kuadrit ligjor të Bankës së Shqipërisë me standardet evropiane për pavarësinë e bankës qendrore dhe ndalimin e financimit monetar të sektorit publik. Sejko nënvizoi rëndësinë e vijimit dhe thellimit të bashkëpunimit me BQE-në.