Sekretari i përgjithshëm i NATO-s, Mark Rutte, ka pohuar se Rusia po humb 20 mijë deri në 25 mijë ushtarë të vrarë çdo muaj në luftën kundër Ukrainës. Deklarata u bë më 14 janar 2026.
Rutte sqaroi se shifrat i referohen vetëm të vrarëve dhe nuk përfshijnë të plagosurit rëndë. “Nuk po flas për ata që janë plagosur rëndë, por për ata të vrarë - të vdekur”, u shpreh ai.
Ai e krahasoi situatën me luftën në Afganistan në vitet 1980, kur Rusia humbi rreth 20 mijë ushtarë gjatë dhjetë vjetëve. “Tani po humbasin atë numër - dhe më shumë - në vetëm një muaj. Kjo nuk është e qëndrueshme edhe për ta”, shtoi Rutte.
Deklarata vjen ndërkohë që forcat ukrainase vazhdojnë të tregojnë një mbrojtje të vendosur kundër agresionit rus, duke shkaktuar humbje të mëdha në radhët e ushtrisë ruse.