Mark Rutte, Sekretari i Përgjithshëm i NATO-s, do të zhvillojë një vizitë në Uashington nga 8 deri më 12 prill, ku pritet të takohet me presidentin amerikan Donald Trump, sekretarin e Shtetit Marco Rubio dhe sekretarin e Mbrojtjes Pete Hegseth.
Takimi me Trump-in është paraparë për të mërkurën e ardhshme. Zëdhënësja e NATO-s, Allison Hart, ka konfirmuar se vizita është planifikuar prej kohësh, ndërsa një zyrtar i Shtëpisë së Bardhë ka dhënë të njëjtin konfirmim.
Vizita ndodh në një moment tensionesh mes SHBA-së dhe aleatëve europianë. Trump ka kritikuar ashpër vendet europiane, përfshirë Britaninë e Madhe dhe Francën, për mungesën e mbështetjes në konfliktin e nisur nga SHBA dhe Izraeli kundër Iranit, veçanërisht për rihapjen e Ngushticës së Hormuz-it. Ai ka paralajmëruar se po shqyrton seriozisht tërheqjen e SHBA-së nga NATO, duke e cilësuar aleancën si një "tigër prej letre".
Rubio ka lënë të kuptohet se Uashingtoni mund të rishqyrtojë marrëdhëniet me NATO-n. Aleatët europianë kanë shprehur rezervë për t'u përfshirë në konflikt për shkak të mungesës së objektivave të qarta dhe konsultimeve paraprake.
Gjatë qëndrimit, më 9 prill, Rutte do të mbajë një fjalim dhe do të marrë pjesë në një diskutim publik të organizuar nga Ronald Reagan Presidential Foundation. Nga 10 deri më 12 prill, ai do të marrë pjesë në takimin e Bilderberg Group, një forum ndërkombëtar me zyrtarë dhe figura të rëndësishme nga SHBA dhe Europa.