Autoritetet doganore, në bashkëpunim me Policinë e Shtetit, kanë goditur një tentativë për trafikim të lëndëve narkotike në Aeroportin Ndërkombëtar të Rinasit. Operacioni u zhvillua pas një sinjalizimi paraprak nga autoritetet kanadeze për një ngarkesë të dyshimtë.
Gjatë kontrollit me skaner të bagazheve të pasagjerëve në fluturimin me itinerar Toronto–Rinas, u identifikuan dy valixhe që ngjallën dyshime. Pas kontrollit fizik në prani të poseduesve, u sekuestruan 46 kilogramë lëndë narkotike e llojit Cannabis sativa, e ndarë në 89 paketime.
Sipas informacioneve, për këtë rast janë arrestuar tre persona: një çift me shtetësi shqiptare dhe një shtetas i huaj. Njëri prej të arrestuarve është identifikuar si Kristian Gjoni. Ai tentoi t'i shmangej kontrollit duke pretenduar se bashkëshortja e tij ishte shtatzënë dhe nuk duhej t’i nënshtrohej procedurave, por pas një verifikimi mjekësor rezultoi se ky pretendim ishte i pavërtetë.
Të tre të dyshuarit ndodhen në paraburgim, ndërsa materialet procedurale i kanë kaluar organeve hetimore për zbardhjen e plotë të rrethanave dhe rolit të secilit prej tyre në këtë veprimtari kriminale.
Përditësime
Hetuesit në Aeroportin e Rinasit sekuestruan 46 kilogramë kanabis, të fshehur në valixhe në vend të rrobave personale. Lënda narkotike u zbulua përmes qenve antidrogë. Autoritetet kanë shtuar kontrollet me skanerë dhe njësi të specializuara për të gjitha fluturimet nga Kanadaja, për shkak të rritjes së tentativave për trafikim pas legalizimit të kanabisit në këtë vend.