Policia dhe Prokuroria për Krim të Organizuar dhe Korrupsion e Maqedonisë së Veriut kryen kontrolle mbrëmjen e 5 shkurtit në fabrikën Alfafarm Grup në Shkup, pranë ish-fabrikës OHIS, si dhe në disa lokacione në rajonin e Strumicës.
Jozyrtarisht, mediat raportojnë sekuestrimin e 27 tonëve kanabis mjekësor nga magazinat, një sasi rekorde. Autoritetet nuk kanë dhënë ende detaje zyrtare, ndërsa pritet publikimi i tyre nga Ministria e Punëve të Brendshme dhe Prokuroria.
Lidhja me ngjarjen serbe
Aksioni pasoi sekuestrimin e 5 tonëve marihuanë nga policia serbe më 29 janar në fshatin Konjuh, afër Kruševc-it. Sasitë e gjetura kishin vlerë të vlerësuar nga 7 deri në 10 milionë euro në tregun e zi. Përveç drogës, u gjetën katër pushkë automatike, një zollë dhe rreth 12.700 euro para.
Prokuroria serbe për Krim të Organizuar dyshon se një grup kriminal e kishte transportuar marihuanën nga Maqedonia e Veriut në Serbi. Procedurë është nisur ndaj pesë personave, midis tyre këshilltarit të Partisë Progresive Serbe, Rade Spasojeviç, djalit të tij Nebojša, Ivan Dragnjiç dhe Uroš Mladenoviç.
Konteksti ligjor dhe mbikëqyrja
Kultivimi i kanabisit për qëllime mjekësore u legalizua në Maqedoninë e Veriut në vitin 2017, për të siguruar produkte të standardizuara për pacientë me sëmundje të rënda. Që atëherë, 61 persona juridikë kanë marrë leje, 43 prej tyre janë aktivë, 14 leje janë revokuar dhe katër të tjera janë në procedurë revokimi.
Komisioni për kanabis, në koordinim me Ministrinë e Punëve të Brendshme, konfirmoi një kontroll të jashtëzakonshëm në Alfafarm, por tha se procedura është ende në zhvillim dhe nuk jepen detaje shtesë. Partia LSDM e cilëson aksionin fushatë mediatike për devijim nga pyetja se kush lejoi kalimin e drogës përtej kufirit.