Në orët e para të së mërkurës, qyteti i Selanikut u trondit nga tre sulme të njëpasnjëshme të koordinuara, të drejtuara ndaj banesave të zyrtarëve të partisë në pushtet, Demokracia e Re (ND). Autoritetet dyshojnë se autorët, të cilët lëviznin me motoçikleta, kanë kryer një plan të organizuar.
Sulmi i parë u shënua në orën 04:18 në zonën Pylaia, pranë një godine që në të kaluarën ka qenë banesë e kryetarit të Komitetit Drejtues të ND-së, Zisis Ioakimoviç. Në këtë rast nuk u raportuan dëme materiale apo të lënduar. Pak minuta më vonë, në orën 04:23, një shpërthim me bombol gazi dëmtoi hyrjen e një pallati në zonën Tumba, ku banon ish-deputeti Savvas Anastasiades, fatmirësisht pa shkaktuar të lënduar.
Incidenti më i rëndë ndodhi në orën 04:35 në zonën Harilaou, në banesën e politikanes Aphrodite Nestora. Zjarri i shkaktuar nga një bombol gazi u përhap me shpejtësi, duke shkatërruar dy automjete dhe duke dëmtuar dy motoçikleta. Për pasojë, nëna 70-vjeçare e Nestorës pësoi djegie të rënda dhe aktualisht po trajtohet e intubuar në Njësinë e Kujdesit Intensiv të spitalit Ippokrateio. Vetë politikania pësoi djegie të lehta, ndërsa babai i saj dhe dy banorë të tjerë të pallatit u dërguan në spital për shkak të problemeve me frymëmarrjen nga tymi.
Shërbimi i Antiterrorit ka marrë çështjen në dorë dhe po analizon pamjet e kamerave të sigurisë për të identifikuar autorët dhe për të zbardhur plotësisht dinamikën e ngjarjeve.