Mbrëmjen e kësaj të shtune, një shpërthim i fuqishëm i një bombole gazi ndodhi në një banesë dykatëshe në fshatin Markatomaj të Lezhës. Si pasojë e këtij incidenti, gjashtë pjesëtarë të familjes së shtetasit Saimir Kola pësuan lëndime trupore.
Sipas raportimeve, tre prej të plagosurve janë transportuar me auto-ambulanca, ndërsa tre të tjerët janë dërguar në spitalin e Lezhës nga familjarët dhe fqinjët e tyre. Burimet mjekësore njoftojnë se tre nga të lënduarit ndodhen në gjendje të rëndë shëndetësore për shkak të djegieve të shumta në trup, çka ka kërkuar edhe dërgimin e njërit prej tyre drejt spitaleve në Tiranë për mjekim të specializuar.
Forcat e Policisë dhe shërbimet zjarrfikëse mbërritën menjëherë në vendin e ngjarjes për të vënë situatën nën kontroll dhe për të nisur hetimet lidhur me shkaqet dhe rrethanat e shpërthimit. Banesa në pronësi të shtetasit Saimir Kola pësoi dëme të konsiderueshme materiale.
Përditësime
Autoritetet identifikuan gjashtë të plagosurit si pronari i banesës, S. K., 40 vjeç, dy të mitur të moshës 10 dhe 13 vjeç, si dhe shtetaset L. U. (64), L. B. (70) dhe V. Gj. (58). Hetimet paraprake zbuluan se bombola e gazit që shkaktoi shpërthimin ishte e instaluar jashtë ambientit të banesës. Familja, e cila jetonte në Itali, ishte kthyer në vendlindje për pushime dhe për të marrë pjesë në një dasmë familjare të planifikuar për ditën e nesërme.
Autoritetet saktësuan se ngjarja ndodhi në fshatin Gajush, duke korrigjuar raportimet e mëparshme për vendndodhjen në Markatomaj. Hetimet zbuluan se shpërthimi ndodhi kur kryefamiljari hapi derën dhe ndezi dritën në pjesën e pasme të banesës, ndërsa pesë familjarët e tjerë ndodheshin në verandë. Familja, e cila po përgatitej për dasmën e mbesës së Saimir Kolës, po planifikon transferimin e kryefamiljarit për mjekim të specializuar jashtë vendit.