Senatorja demokrate Jeanne Shaheen, anëtare e Komitetit të Senatit për Marrëdhënie me Jashtë, ka kërkuar rivendosjen e sanksioneve amerikane ndaj udhëheqësit të Republikës Srpska, Milorad Dodik. Ky reagim vjen në vazhdë të vizitës së tij në SHBA, ku ai ka marrë pjesë në Lutjet e Mëngjesit dhe ka zhvilluar një takim me zëdhënësen për media të presidentit Donald Trump, Karoline Leavitt.
Në një deklaratë, Shaheen tha se administrata Trump duhet të ndihet e turpëruar nga vendimi për të hequr Dodikun dhe bashkëpunëtorët e tij nga lista e sanksioneve më 29 tetor 2025. Ajo theksoi se Dodik ka përdorur retorikë separatiste dhe ka minuar integritetin e Marrëveshjes së Paqes së Dejtonit, çka bie ndesh drejtpërdrejt me arsyetimin e administratës për heqjen e sanksioneve.
"Vizita e z. Dodik në Uashington e ka bërë plotësisht të qartë se ai nuk është i interesuar t’i vërë interesat e të gjithë qytetarëve të Bosnjës përpara interesave të tij politike", shkroi Shaheen. Ajo kërkoi që administrata Trump të veprojë me shpejtësi për të rivendosur sanksionet, në përputhje me ato të detyrueshme të siguruar në Aktin më të fundit të Autorizimit të Mbrojtjes Kombëtare.
Sanksionet ndaj Dodik u vendosën fillimisht në vitin 2017 nga Ministria e Financave dhe Thesari i SHBA-së (OFAC), për veprime të konsideruara si kërcënim për stabilitetin e Bosnjës dhe Hercegovinës dhe shkelje të Marrëveshjes së Dejtonit. Më 29 tetor 2025, OFAC hoqi sanksionet ndaj tij dhe personave të tjerë nga Republika Srpska.