Presidenti i Serbisë, Aleksandar Vuçiç, ka shpalosur planet për bashkëpunim me kompaninë izraelite Elbit Systems për prodhimin e dronëve të aftë për të gjurmuar dhe përzgjedhur objektiva. Sipas kreut të shtetit serb, këta dronë kanë aftësinë të hyjnë në hapësira të mbyllura për të identifikuar objektivin. Serbia pritet të zotërojë gjysmën e pronësisë në këtë sipërmarrje, ndërsa partneri vendas i kompanisë izraelite parashikohet të jetë Jugoimport-SDPR, ndërmarrja shtetërore e industrisë së mbrojtjes.
Megjithatë, të dhënat zyrtare nga regjistri i bizneseve tregojnë se kompania e përbashkët ende nuk është regjistruar zyrtarisht. Ndërkohë, Elbit Systems, e cila renditet e 25-ta në listën e 100 prodhuesve më të mëdhenj të armëve në botë sipas SIPRI, përballet me kufizime ndërkombëtare. Në korrik të vitit 2025, NATO nisi një hetim të brendshëm ndaj kompanisë për dyshime mbi veprime korruptive, duke pezulluar përkohësisht pjesëmarrjen e saj në tenderët e rinj.
Analistë të sigurisë, si Kobi Michael nga Instituti për Studime të Sigurisë Kombëtare në Tel Aviv dhe eksperti i marrëdhënieve ndërkombëtare Mirko Dautoviq, vlerësojnë se kjo lëvizje është një strategji për të siguruar kapacitete prodhuese rezervë jashtë vendeve perëndimore, ku kompania përballet me presione të shtuara nga aktivistët dhe pasiguri politike për shkak të luftës në Gaza.
Deri më tani, as Ministria e Mbrojtjes e Serbisë, as Elbit Systems dhe as Jugoimport-SDPR nuk kanë dhënë detaje shtesë mbi marrëveshjen ose financimin e projektit. Gjithashtu, NATO nuk ka ofruar sqarime të mëtejshme mbi statusin e hetimit ndaj kompanisë izraelite.
Përditësime
Presidenti i Serbisë, Aleksandar Vuçiç, konfirmoi nga poligoni ushtarak Pasuljanske Livade se droni i përzgjedhur për prodhim është modeli LANIUS-X. Plani parashikon fillimin e procesit të prodhimit për në shtator. Sipas marrëveshjes, shteti serb do të zotërojë 50% të kompanisë së përbashkët, e cila aktualisht nuk është regjistruar ende në regjistrin zyrtar të bizneseve.