Organizatorët e Lojërave Mesdhetare “Taranto 2026” njoftuan zyrtarisht ndryshime në orarin e garave dhe të transmetimeve pas tërheqjes së përfaqësueseve të Serbisë dhe Maqedonisë së Veriut nga turneu i basketbollit 3x3. Si pasojë e këtyre largimeve, Unioni i Transmetuesve Evropianë (EBU) ka konfirmuar zëvendësimin e orarit të mëparshëm me një version të ri.
Ky vendim ka anuluar përballjen e planifikuar mes Kosovës dhe Serbisë, e cila duhej të zhvillohej më 29 gusht. Ndonëse nuk është dhënë ndonjë arsye zyrtare për këtë largim, koha dhe rrethanat e vendimit kanë ngritur pikëpyetje, pasi Serbia në të kaluarën ka shmangur përballjet sportive me përfaqësueset e Kosovës ose ka kërkuar ndryshime në short për të mos u vendosur në të njëjtin grup.
Pas këtij zhvillimi, vëmendja është zhvendosur te finalja e kategorisë deri në 60 kilogramë për femra në boks. Boksierja kosovare Donjeta Sadiku do të garojë për medaljen e artë kundër Kristina Kuhulova, një sportiste ruse me pasaportë serbe. Meçi, i cili përbën një tjetër moment përballjeje për sportistët e Kosovës me palën serbe, pritet të zhvillohet sot në orën 17:15 dhe do të transmetohet drejtpërdrejt nga RTK.
Përditësime
Organizatorët e turneut të basketbollit 3x3 njoftuan ndryshime të reja në formatin e garës pas tërheqjes së përfaqësueseve të Serbisë dhe Maqedonisë së Veriut. Kombëtarja e Kosovës do të ndeshet me Portugalinë më 29 gusht, në orën 17:00. Grupi C është rikonfiguruar dhe tani përbëhet nga Kosova, Portugalia dhe Turqia. Komiteti organizues publikoi gjithashtu orarin e plotë të ndeshjeve, i cili përfshin përditësime për të gjitha kategoritë e meshkujve dhe femrave.
Kombëtarja e femrave në basketboll 3x3 vijon garën në turneun e Tarantos. Skuadra do të përballet sot me Greqinë në orën 18:00 dhe me Italinë në orën 19:50. Dy vendet e para të Grupit C do të sigurojnë kualifikimin për në çerekfinale. Organizatorët kanë konfirmuar se ndeshjet e fazës finale të turneut do të zhvillohen më 31 gusht dhe 1 shtator.
Media serbe Kurir konfirmoi zyrtarisht se tërheqja e Serbisë nga gara ishte e motivuar nga refuzimi për t'u përballur me përfaqësuesen e Kosovës. Presidenti i Komitetit Koordinues të Lojërave Mesdhetare, Stavri Belo, deklaroi se shpresonte në shmangien e incidenteve dhe rikujtoi se përballjet mes dy vendeve kanë ndodhur më parë në sporte individuale si xhudoja.