Serbia ka pajisur avionët e saj luftarakë MiG-29 me raketa balistike ajër-tokë CM-400AKG të prodhimit kinez, sipas revistës ushtarake Military Watch. Fotografitë e publikuara tregojnë një avion MiG-29 të Forcave Ajrore serbe me dy raketa të tilla nën krahë, duke konfirmuar integrimin e tyre.
Serbia është bërë vendi i parë në Evropë, forcat ajrore të së cilës përdorin raketa balistike kineze në avionë luftarakë, dhe operatori i dytë i huaj pas Pakistanit, që i përdor në avionët JF-17 Thunder. Raketat arrijnë shpejtësi mbi Mach 6 (rreth 7 mijë kilometra në orë).
Raketa CM-400AKG ka rreze veprimi deri në 400 kilometra (sipas disa specifikimeve, 240-400 kilometra), peshon rreth 900 kilogramë dhe ka gjatësi rreth 5 metra. Ajo përdor navigim inercial, satelitor dhe udhëzim me radar pasiv, dhe mund të pajiset me kokë luftarake shpërthyese ose depërtuese. Integrimi është bërë përmes sistemit kinez WZHK-1, që lejon përdorimin në avionë rusë pa modifikime të mëdha.
Forcat Ajrore serbe disponojnë rreth 14 avionë MiG-29 modernizuar, të trashëguar nga ish-Jugosllavia dhe të marrë si ndihmë nga Rusia dhe Bjellorusia gjatë viteve 2000 dhe 2010. Këta avionë kishin aftësi goditëse të kufizuara për shkak të radarëve të vjetër, por raketat CM-400AKG kompensojnë këtë, duke përdorur të dhëna shënjestrimi nga sensorë të jashtëm.
Serbia ka nënshkruar marrëveshje për blerjen e 12 avionëve Rafale nga Franca. Beogradi ka zgjedhur sisteme kineze, si mbrojtjen ajrore HQ-22, pavarësisht presionit evropian për të kufizuar blerjet nga Kina dhe Rusia.