Profesori amerikan Daniel Serwer e ka cilësuar deklaratën e ministres serbe Snezhana Paunoviç si të papranueshme dhe jashtëzakonisht të rëndë. Në një intervistë për televizionin N1, Serwer theksoi se mbajtja në detyrë e ministres ngre pikëpyetje mbi qasjen e institucioneve serbe ndaj retorikës së krimeve të luftës.
Snezhana Paunoviç, anëtare e Partisë Socialiste të Serbisë, deklaroi më 11 korrik se nëse do të kishte qenë në vendin e Sllobodan Millosheviçit gjatë luftës, ajo do ta kishte "pastruar etnikisht" Kosovën në vitin 1998. Si pasojë e kësaj deklarate, institucionet e Kosovës e kanë shpallur atë person non grata, ndërsa Ministria e Drejtësisë ka njoftuar ndërmarrjen e hapave ligjorë.
Kjo retorikë është dënuar zyrtarisht nga Bashkimi Europian dhe Departamenti i Shtetit i Shteteve të Bashkuara. Ndërkombëtarët e kanë cilësuar gjuhën e përdorur si një kthim drejt periudhës së krimeve dhe dëbimeve masive, duke kërkuar reagime të qarta për të distancuar politikën shtetërore nga këto qëndrime.